Ísfugl ehf. rekur sláturhús, kjötvinnslu og dreifingarstöð fyrir afurðir alifugla. Í sláturhúsinu er slátrað kjúklingum, kalkúnum og unghænum allan ársins hring. Mikil aukning hefur verið á framleiðslu undanfarin ár vegna vaxandi eftirspurnar á fuglakjöti, og þá sérstaklega fersku.

Núverandi hluthafar Ísfugls eru Markís ehf. sem á 70% og Sláturfélag Suðurlands sem á 30% hlut. Eigendur Markís ehf. eru:  Hvammur ehf, Logi Jónsson, Rafn Haraldsson og Reykjabúið ehf. Sláturhúsið að Reykjavegi 36, þar sem Ísfugl er með starfsemi sína var byggt 1978, hóf starfsemi 1979 og hefur verið í rekstri óslitið síðan.

Vörumerkið Ísfugl hefur ætíð verið notað þó rekstraraðilarnir á sláturhúsinu hafi verið þrír í gegnum tíðina. Fyrstir voru það Hreiður frá 1979 til 1987 og þá tóku Markaðskjúklingar ehf við. Það félag tók síðar upp nafn vörumerkisins eða 1999 og heitir nú Ísfugl ehf.